Kuri uyu wa 15/10/2019 mu murenge wa Karama Umuyobozi w’Akarere wungirije ushinzwe imibereho myiza, Mme Murekatete Juliet, ari kumwe n’abayobozi mu nzego z’abagore barimo uhagarariye umuyobozi w’Inama y’Igihugu y’abagore ku rwego rw’Intara, Umuhuzabikorwa wa CNF y’Akarere wungirije n’abandi bayobozi , bifatanyije n’abaturage b’Akagari ka Bushara mu muhango wo kwizihiza umunsi w’umugore wo mu cyaro wizihirijwe mu mudugudu wa Mutima w’Urugo Ntangarugero w’Ururembo.

Muri uyu muhango hamuritswe ibikorwa by’abagore bo muri uyu mudugudu w’Ururembo birimo iby’ubukorikori ndetse urubyiruko n’abagore bigaga ubukorikori bahabwa impamyabushobozi nk’abarangije kwiga imyuga, hanaremerwa abagera kuri 14 bahawe amatungo magufi, abandi bahabwa ibikoresho by’isuku birimo amasabune.

Umuyobozi w’Akarere wungirije ushinzwe imibereho myiza yakanguriye abaturage na ba mutima w’urugo gufatanya n’imiryango barimo mu gukemura ibibazo byugarije imibereho myiza y’umuturage birimo abatagira aho baba, abatagira ubwiherero n’ibiyobyabwenge, kwita ku mirire myiza, uburere n’uburezi bw’abana ndetse no kugira isuku muri rusange hagamijwe kubaka umuryango utekanye kandi uteye imbere.

Umuyobozi w’Akarere wungirije ushinzwe imibereho myiza yanasabye abaturage kwirinda amakimbirane mu miryango ndetse n’aho agaragaye bakaba bakwiyunga binyuze mu mugoroba w’ababyeyi no kugana inshuti z’umuryango, ashishikariza imiryango ibana itarasezerana kubikora muri iki gihe cy’ubukangurambaga bw’imiyoborere myiza no guha abana uburenganzira bwabo babandikisha mu bitabo by’irangamimerere.

Muri uyu muhango kandi Umuhuzabikorwa w’Inama y’Igihugu y’Abagore mu karere wunhgirije, Mme Mutegwaraba Egidia yagaragaje intabwe imaze guterwa n’abagore mu kwiteza imbere ndetse no kwicyemurira ibibazo mu miryango, anabakangurira kwita ku mirire n’isuku by’abagize umuryango, bitabira gahunda y’igikoni cy’Umudugudu, uturima tw’igikoni, umugoroba w’ababyeyi ndetse no kurangwa n’isuku kugira ngo bagire ubuzima bwiza.