Kuri uyu wa 29/10/201 Umuyobozi w'Akarere,Bwana Mushabe David Claudian, ari kumwe n'abayobozi b'inzego z'umutekano hamwe n'umuyobozi w'ishami ry'imiyoborere myiza,yitabiriye inteko rusange y'abaturage b'Akagari ka Ntoma,Umurenge wa Musheri, anatangiza gahunda y'ukwezi kwahariwe imiyoborere n'imibereho myiza mu muryango. Iyi gahunda kandi yabanjirijwe n'urugendo rw'ubukangurambaga bugamije kwamagana ruswa n'akarengane

Abaturage bakanguriwe kuzitabira serivice zizatangwa muri ubu bukangurambaga banazigiramo uruhare nk'umuryango. Muri ubu bukangurambaga hazibandwa ku kurwanya ibibazo bibangamiye umuryango, kwita ku burere bw'abana mu miryango, kurwanya imirire mibi, kurwanya imirimo mibi ikoreshwa abana kwandikisha abana mu bitabo by'irangamimerere, gusezeranya imiryango yabanaga bitemewe n'amategeko,gukurikirana no kwitabira umugoroba w'ababyeyi no kugaragariza abaturage serivice zitangwa n'inzego z'ibanze.

Ukwezi kw'imiyoborere n'imibereho myiza kwatangijwe none kuzasozwa kuwa 10/12/2019, hagamijwe gukangurira abaturage uruhare rw'umuryango mu kubaka ubushobozi bw'abawugize.

Umuyobozi w'Akarere yasabye ko uretse kunoza serivise zihabwa abaturage, ubu bukangurambaga bw'imiyoborere n'imibereho myiza mu muryango bugamije kubaka umuryango utekanye, uzira amakimbirane ,ubayeho neza kandi ubanye neza, wita no ku burere n'uburezi bw'abana.