Kuri uyu wa 19 Nzeli 2022 mu karere hatangijwe icyumweru cyahariwe ibikorwa byo kwimakaza ihame ry’uburinganire, cyateguwe ku bufatanye n'Intara y'Iburasirazuba n'Urwego rw'Igihugu rushinzwe kugenzura Ihame ry'uburinganire (GMO) ,gifite insanganyamatsiko : "Kwimakaza ihame ry'uburinganire, imbarutso y'imiyoborere myiza n'Iterambere rirambye”

Mu murenge wa Nyagatare watangirijwemo iki cyumweru, imiryango 47 yabanaga itarasezeranye yiyemeje kubana byemewe n'amategeko iranasezerana. Indi miryango 27 yasezeraniye mu murenge wa Karangazi naho indi 8 isezeranira mu murenge wa Mukama.

Muri iki cyumweru cyahariwe kwimakaza ihame ry'uburinganire hazasezeranywa imiryango 285 yiyandikishije gusezerana kubana uko amategeko y'u Rwanda abiteganya. Ibindi bikorwa by’ingenzi bizakorwa harimo ubukangurambaga bugamije kwimakaza ihame ry’uburinganire, kwandika abana bavutse mu bitabo by’irangamimerere, guhugura abakobwa babyaye bakiri bato gusubiza mu mashuri bamwe bayacikirije, kubaremera no gutera inkunga imishinga yabo.

Umuyobozi w’Akarere Bwana Gasana Stephen yavuze ko: “Ubukangurambaga bwo kwimakaza ihame ry'uburinganire buje bwunganira ubundi ubwo kurengera umwana n'ubw'umuryango utekanye kandi uteye imbere. Ni ubukangurambaga bureba ababyeyi,abarezi,inzego z’ubuyobozi,abafatanyabikorwa n’abana. Mu Karere, mu myaka ishize twagiye tugira ikibazo cy’abana baterwa inda batarageza imyaka y’ubukure.

Zimwe mu mpamvu abana bagaragaza zituma batwara inda zirimo amakimbirane mu miryango ariko nyuma yo kuganiriza iyi miryango,igera ku 150 yarayaretse.

Nyirinkindi Joyeuse avuga ko we n'umutware we mu rugo bahoze mu makimbirane ariko nyuma yo kwiyunga batangiye kwiyubaka ndetse bari no gutera imbere; mu rugo babayeho neza, akanashishikariza abandi bashakanye kuganira no kwita ku iterambere ry'umuryango.

Umuyobozi w’Urwego rw’Ubugenzacyaha (RIB) ku rwego rw'Akarere ka Nyagatare,Bwana Niyonshuti Jean Pierre ,yibukije abaturage amategeko ahana abahohotera abo bashakanye, abahohotera n'abasambanya abana na zimwe mu ngaruka z'ihohoterwa zirimo n'ihungabana.

Umunyamabanga Nshingwabikorwa wa GMO , Mme Cyizanye Allen yavuze ko “kwimakaza ihame ry'uburinganire ni ugusigasira umuryango utekanye kandi ushoboye."

Umuyobozi wa RGB, Dr. Usta Kayitesi yagize ati:”Igihugu cyacu cyaharaniye ubumwe, giharanira amahoro, ayo mahoro ntakwiye kubura mu ngo zacu. Uburinganire si ukwigaranzura. Umugabo akenera umufasha kuko amukwiriye kandi n'umugore akeneye umugabo umukwiriye. Buri wese akore inshingano ze twuzuzanye.Yaba umugabo yaba umugore umwe ajya mu mirimo, undi akajya mu yindi bagahahira urugo bakarwubaka,ntawutesha undi agaciro.Ibyo nimubikora, twese tuzashimishwa n'uko buri rugo rwateye imbere.”

Mu muhango wo gutangiza Icyumweru cyahariwe ibikorwa bigamije kwimakaza ihame ry'uburinganire, habaye ubusabane hagati y'imiryango yasezeranye, ubuyobozi n'abaturage bitabiriye. "Ihame ry'uburinganire, imbarutso y'imiyoborere myiza n'Iterambere rirambye".