Kuri uyu wa 2/11/2019 Umuyobozi w’Akarere, Bwana Mushabe David Claudian yakiriye Minisitiri w’Ubutegetsi bw’Igihugu, Prof. Shyaka Anastase,Guverineri Fred MUFULUKYE, abadepite n'abasenateri mu Nteko Ishingamategeko bakomoka mu karere ka Nyagatare,Abayobozi b’Inzego z’Umutekano zikorera mu karere, Abajyanama mu Nama Njyanama n'abandi bayobozi kugera ku rwego rw'Umudugudu bitabiriye inama mpuzabikorwa y'Akarere yayobowe na Minisitiri w’Ubutegetsi bw’Igihugu, Prof. Shyaka Anastase.

Muri iyi nama, Umuyobozi w’Akarere yagejeje ku bayitabiriye ishusho rusange y'Akarere ndetse n'ibimaze kugerwaho mu iterambere, anashimira Leta ku nkunga itera Akarere mu kubaka ibikorwa remezo birimo amavuriro,amashuri, imihanda,amazi n'amashanyarazi byagiriye akamaro abaturage n'abikorera.

Umuyobozi w'Akarere yabwiye abitabiriye inama mpuzabikorwa ko bashimira Nyakubahwa Perezida wa Repubulika Paul Kagame ku bikorwa remezo binini byubatswe muri aka Karere nk'Ibitaro bya Gatunda byenda kuzura, Stade ya Nyagatare n'ibindi Umuyobozi w’Akarere yasoje ijambo ry'ikaze asaba ko iyi nama waba umwanya wo kungurana ibitekerezo ku ngamba zo gusigasira iterambere ry'Akarere n'imibereho y'abaturage no kurushaho kugateza imbere kuko imihigo ikomeje kandi hakenewe uruhare rwa buri wese.

Abafashe ijambo barimo abayobozi b’imidugudu, Abayobozi bahagarariye abanyamadini n’amatorero, abajyanama mu Nama Njyanama hamwe n’abahagarariye abikorera bashimye iri huriro baniyemeza kurushaho kugira uruhare mu iterambere ry’umuturage.

Muri iyi nama kandi Abayobozi b'inzego zegereye abaturage kugera ku rwego rw’Akarere bihaye amezi ane yo kuba bakemuye ibibazo bikibangamiye imibereho myiza y'abaturage birimo iby’abadafite amacumbi n’abana bakiva mu ishuri, biyemeza ko bagiye kwegera abatuarage kurushaho no gukemura ibi bibazo.

Guverineri w’Intara y’Iburasirazuba,Bwana MUFULUKYE Fred yasabye abayobozi bitabiriye inama Mpuzabikorwa y’Akarere ko buri wese yongera kwisuzuma mu nshingano ze, agaharanira gukosora ibitagenda neza bikigaragara mu rwego rwo kwitura Nyakubahwa Perezida Paul Kagame uhora azana iterambere muri aka Karere.

Mu butumwa yagejeje kubitabiriye mpuzabikorwa y'Akarere, Minisitiri Prof. Shyaka Anastase yasabye abayobozi kuzirikana ko umutekano n'umudendezo by'umuturage ari ntayegayezwa. Minisitiri w’Ubutegetsi bw’Igihugu yashimangiye ko Akarere ka Nyagatare gafite n'andi mahirwe menshi mu buhinzi n'ubworozi kandi ko ayo ni amahirwe agomba kubyazwa umusaruro bityo n’Akarere kagatera imbere byisumbuyeho.

Minisitiri Prof. Shyaka Anastase yibukije ko gukorera umuturage, nta mugeri urimo, nta nkoni irimo ahubwo ko umuturage aganirizwa, haba hari uwakoze amakosa akomeye agashyikirizwa inzego z'ubutabera zibishinzwe aho kumukubita.

Muri iyi nama kandi hanatanzwemo ibiganiro ku mutekano, kurwanya ikoreshwa ry’ibiyobyabwenge, magendu n’ibyambu bitemewe hamwe n’ikiganiro ku bibazo bibangamiye imibereho myiza y’abaturage, ababashije kubikemura batanga ubuhamya n’inama ku cyakorwa ngo n’ahandi bitarakemuka bikemuke. Ibi biganiro kandi byanatanzweho ibitekerezo hemezwa ko hagiye kubaho ubufatanye, kurushaho kwegera abaturage no guhana amakuru hagamijwe gukemura ibibazo bikigaragara.

Inama Mpuzabikorwa y’Akarere yateranye none yari ifite insanganyamatsiko igira iti:”Umuturage ku isonga, Umusingi w’iterambere rirambye.