Kuri uyu wa 7/11/2019 Hon.Guverineri w'Intara y'Iburasirazuba MUFULUKYE Fred,ari kumwe n’Umuyobozi w’Akarere n’Umuyobozi w’Ingabo zikorera mu turere twa Nyagatare,Gatsibo,Kayonza na Rwamagana, Col.Rugambwa Albert bifatanyije n'Ubuyobozi bwa Kaminuza y’u Rwanda/Ishami rya Nyagatare mu muhango wo kwinjiza intore z'abanyeshuri barenga 3000 mu zindi ntore, no gusoza icyumweru cyo kubamenyereza.

Muri uyu muhango Umuyobozi w’Akarere yahaye aba banyeshuri ikaze anabizeza ko Ubuyobozi bwiteguye kubaba hafi no gukora igishoboka ngo babone imibereho myiza n'umutekano bifuza, anashimira Ubuyobozi bw'Igihugu bwohereje aba banyeshuri hano kuko yizeye ko hamwe na bo Akarere kazarushaho kuba keza.

Col. Rugambwa Albert uyobora Ingabo zikorera muri Nyagatare,Gatsibo,Kayonza &Rwamagana yasabye aba banyeshuri baje kwiga muri Kaminuza y’u Rwanda/Ishami rya Nyagatare kwirinda icyabatandukanya nk'abanyarwanda no gukomera ku muco wo kurinda ubusugire bw'Igihugu, twarazwe n'abakurambere b'intwari z’u Rwanda.

Guverineri Mufulukye yasobanuriye aba banyeshuri bashya baje kwiga muri Kaminuza ya UR /Ishami rya Nyagatare imiterere y'iyi Ntara muri rusange n'Akarere ka Nyagatare ndetse n'amahirwe yihariye ahagaragara,ababwira ko uretse kuhigira amasomo, bazanamenya ibyiza by'Igihugu cyacu.

Guverineri MUFULUKYE Fred yasabye aba banyeshuri kwiga neza, gukora cyane no guhanga udushya tugirira abanyarwanda akamaro. Yabasabye kandi kugira imyitwarire myiza, kureka kwirara no gukunda Igihugu, bagira uruhare mu guhindura imibereho y'abaturage ikarushaho kuba myiza.

Guverineri yasobanuriye aba banyeshuri ko gukunda Igihugu atari indirimbo ahubwo ari ibikorwa, abasaba gukundana ubwabo no kuba umwe, bagashyira hamwe ko ari bwo tuzagera ku iterambere twifuza. Guverineri kandi yabasabye kugaragaza isura nyayo y'u Rwanda no kwirinda ibihuha bisubiza abanyarwanda inyuma.

Guverineri w’Intara yashimiye Nyakubahwa Perezida wa Repubulika Paul Kagame wumvise ubusabwe bw'abaturage b'Akarere bigatuma abanyeshuri benshi bongera koherezwa muri Kaminuza /Ishami rya Nyagatare,akavuga ko nta kabuza, bigiye gutuma iterambere ry'Umujyi ryihuta.

Mbere yo kwinjizwa mu zindi ntore, aba banyeshuri bahigiye imbere ya Guverineri w'Intara kwiga bashyizeho umwete, kugira uruhare muri gahunda za Leta, kuba umusemburo w'iterambere, kugira umuco wo kuzigama no kurwanya ubushomeri n'ibiyobyabwenge, kubakira abatishoboye 3 no kurwanya imirire mibi.

Guverineri w'Intara Fred Mufulukye yinjije intore z'abanyeshuri baje kwiga muri UR/Ishami rya Nyagatare mu zindi ,azita Intagamburuzwa