Kuri uyu wa 08/12/2021 Umuyobozi w’Akarere Bwana GASANA Stephen yasinyanye n’aborozi amasezerano yo gukoresha neza ubutaka bwagenewe ubworozi no kububyaza umusaruro ukwiye.

Aborozi basobanuriwe ibikubiye mu masezerano yo gucunga, gukoresha no kubyaza umusaruro ukwiye ubutaka bwagenewe ubworozi (urwuri) .Aya masezerano agamije kunoza imikoreshere y'inzuri zasaranganyijwe no kwiyemeza gukora ubworozi butanga umusaruro utubutse no kubyaza umusaruro ukwiye ubutaka bwagenewe ubworozi (urwuri).

Mu butumwa Guverineri w’Intara y’Iburasirazuba CG Emmanuel Gasana yahaye aborozi bo mu Karere ka Nyagatare katangirijwemo ubu bukangurambaga bwo gukoresha inzuri neza no kuzibyaza umusaruro ukwiye, yabibukije ko bafitanye igihango na Nyakubahwa Perezida wa Repubulika Paul Kagame, kuko muri aka Karere ariho yahereye atanga inzuri abasaba kuzibyaza umusaruro.

"Turabakangurira korora kinyamwuga; mumenye gutegura urwuri neza, guhitamo icyororo cy'inka n'imbuto z'ubwatsi, tworore neza, twongere umukamo mu bwinshi no mu bwiza, woherezwa ku isoko" Guverineri Gasana. … "Ntacyo Perezida wa Repubulika atadukoreye,ahasigaye muhitemo tujyanemo kandi dukore ibyo tugomba gukora". Guverineri Gasana

Guverineri w’Intara yibukije aborozi ko isi irimo kwihuta cyane abasaba gukora cyane, gukunda Igihugu, gukunda umurimo no kuba umwe kuko aribyo bizatuma bagera ku iterambere.

Mirenge Desire, umuturage wororera mu Murenge wa Karangazi, Akagari ka Nyamirama, Umudugudu w'Akayange avuze ko biteguye kubahiriza ibikubiye muri aya masezerano no kubyaza umusaruro izi nzuri, bakazitera ubwatsi kandi bakubahiriza ibiteganywa n'amabwiriza agenga imikoreshereze y'inzuri.

Mu karere ka Nyagatare habarurwa inzuri 7520 ziri ku buso bwa hegitari 68,284 zikorerwaho ubworozi cyane ubw’amatungo manini nk’inka zigera kuri 113,380  n’andi matungo magufi.

Muri ubu bukangurambaga kandi aborozi basabwa guhinga ubwatsi bw’ amatungo no kwiga  guhunika ubwatsi bufasha kugabura mu gihe cy’ izuba, kuvugurura icyororo cy’ inka mu rwego rwo kuzamura umukamo hakoreshwa gutera intanga cyangwa gukoresha impfizi zivuguruye cyane, guhagarika ibikorwa byo gukoresha nabi ubutaka bwagenewe kororeraho babukoresha mu bikorwa by’ubuhinzi birenze 30% by’urwuri, kuvugurura inzuri (guteramo ubwatsi bwongera umukamo, kuzitira, guca paddocks mu rwuri n’ ibindi, kugira isuku y’ amata kugira ngo bigabanye ibihombo biturutse ku mata atujuje ubuziranenge, gufata amazi y’ imvura mu nzuri zabo bagura damsheets cyangwa gucukara valley dams ntoya mu nzuri zabo zifata amazi y’ imvura no kurwanya indwara z’ ibyorezo n’ indwara z’ uburondwe zikunda kwica inka bigateza igihombo