Kuri uyu wa 22/2/2019 mu karere ka Nyagatare habereye inama nyunguranabitekerezo ku iterambere ry'ubukerarugendo mu Ntara y'Iburasirazuba, ibera muri EPIC Hotel&Suites iyobowe na Hon. Guverineri w'Intara Mufulukye Fred ari kumwe n'Umuyobozi Mukuru ushinzwe ubukerarugendo mu Kigo cy'Igihugu cy'Iterambere (RDB), Mme Belise Karisa.

Atangiza iyi nama, Guverineri Mufulukye yashimiye RDB kuba yarahisemo gutegura iyi nama kugirango higwe uburyo amahirwe mu ishoramari ry’ubukerarugendo agaragara muri iyi Ntara yabyazwa umusaruro. Guverineri yabwiye abitabiriye iyi nama ko Intara y’Iburasirazuba ifite amahirwe menshi mu bukerarugendo, uhereye ku miterere y’iyi Ntara ifite imirambi ishashe, Parike y'Akagera, Ibiyaga byinshi, amahoteli meza arimo na EPIC Hotel&Suites iri ku rwego rw’inyenyeri 4 ikaba ari nay o yabereyemo iyi nama, kuba Intara ihana imbibi n’ibihugu 3 bigize umuryango w’Ibihugu bya Afurika y’Iburasirazuba ( EAC) ari byo Uganda, Tanzania n’u Burundi) ikaba ari irembo ry’umuhora wo hagati (central corridor) uhuza u Rwanda n’ibice by’Ibihugu bituriye icyambu cya Mombasa. Uretse ibi kandi iyi Ntara ifite n’ahandi hantu henshi hafite ibimenyetso by’amateka arimo n’ay’urugamba rwo kubohora Igihugu.

Umuyobozi Mukuru ushinzwe ubukerarugendo yagaragaje ishusho rusange y'ubukerarugendo mu gihugu aho yagaragaje ko mu mwaka wa 2017 Igihugu cyakiriye abakerarugendo basaga 94,000 barimo 38%bo mu gihugu na 62% baturutse mu mahanga bose bakaba barinjirije Igihugu agera kuri US$ miliyoni 18.6, anashishikariza abanyarwanda gutembera u Rwanda mu bice bitandukanye.

Umuyobozi ushinzwe Ubukerarugendo mu Kigo cy’Igihugu gishinzwe iterambere (RDB) Madamu Belise Kariza yanavuze ko Ubukerarugendo ari inkingi ikomeye mu iterambere ry’Igihugu ariyo mpamvu RDB ifatanyije n’izindi nzego yifuza kubyaza umusaruro amahirwe mu bukerarugendo agaragara muri iyi Ntara. Yavuze ko Pariki y’Akagera ariyo Pariki yasuwe n’abantu benshi mu mwaka wa 2017 bangana n’ibihumbi 44 (44,000) yinjiza Miliyoni y’Amadolari y’Amerika ibi bikaba bitanga icyizere ko n’andi mahirwe ahari aramutse abyajwe umusaruro byarushaho guteza imbere igihugu.

Abari mu nama kandi bagaragarijwe gahunda yo kwita ku handi hantu nyaburanga hakaba habyazwa umusaruro mu bukerarugendo bushingiye ku mateka, umuco n'inama hubakwa amahoteri.

Inama yashoje hemejwe ko hagiye gukorwa inyigo z'ahantu nyaburanga n'ahabumbatiye amateka y'u Rwanda kugira ngo habungabungwe habe hanabyara umusaruro.

Nyumayo kungurana ibitekerezo ku mahirwe agaragara muri iyi Ntara mu bukerarugendo n’icyakorwa ngo abyazwe umusaruro, imwe mu myanzuro yavuyemo ni uko hemejwe ko Ubuyobozi bwa RDB, Inzego z’ibanze, Abikorera n’izindi nzego bakomeza gufatanya n’Uturere, hakagaragazwa ahakwiye kwibandwaho muri buri Karere ndetse n’uruhare rwa buri rwego kandi bigashyirwa mu igenamigambi ry’Uturere.

Abikorera banakanguriwe gushora imari mu bukerarugendo babyaza umusaruro amahirwe ari muri iyi ntara.

Iyi nama ibaye nyuma yo gusura hamwe mu hantu nyaburanga na ndangamateka ho mu Ntara y'Iburasirazuba harimo Umusozi wa Fumbwe (Rwamagana), Utubindi twa Rubona n'Urutare rwa Ngarama (Gatsibo), Ingoro y'Umwami Mutara III Rudahigwa ya Mimuli, Agasozi ka Nyabwishongwezi ahaguye Intwari y'u Rwanda Nyakwigendera Maj. Gen. Fred Gisa Rwigema mu rugamba rwo kubohora Igihugu hamwe n'Ishyamba ry'imikinga rikikije Umugezi w'Umuvumba (Nyagatare).

Iyi nama yanitabiriwe n'Umuyobozi wa Police n'uw'Urwego rukuru rushinzwe abinjira n'abasohoka ku rwego rw'Intara Ntara n'abagarariye ibigo bya leta n'iby'abafatanyabikorwa mu iterambere n'ubukerarugendo batandukanye, abayobozi b'uturere tugize Intara y'Iburasirazuba ndetse n'abayobozi b'inzego z'abikorera mu turere n'Intara.