Mu bukangurambaga bwabaye tariki 28-05-2025 muri sitade y’Akarere ka Nyagatare, Abamotari bakanguriwe gukoresha ingofero z’umutekano (kasike) zujuje ubuziranenge, mu rwego rwo gukumira impanuka no kurinda ubuzima bwabo ndetse n’ubw’abagenzi batwara.

Iki gikorwa cyateguwe ku bufatanye bw’inzego zitandukanye zirimo Polisi y’u Rwanda ishami rishinzwe umutekano wo mu muhanda.

Ni igikorwa cyahuriyemo abamotari barenga 500, aho bagaragarijwe akamaro ko gukoresha kasike zujuje ubuziranenge, bakareka gukoresha izidozadoze cyangwa zangiritse kuko zishobora gutuma impanuka zo mu muhanda zigira ingaruka zikomeye ku mutwe, rimwe na rimwe zikaviramo urupfu abari kuri moto.

Umuyobozi wungirije wa Polisi y’u Rwanda mu ishami rishinzwe umutekano wo mu muhanda, CSP Habintwari Vincent ni we wari uhagarariye Polisi muri iki gikorwa. Mu ijambo rye, yagaragaje ko umutwe ari igice cy’umubiri kidashobora gusimburwa, bityo ugomba kurindwa byihariye.

Yagize ati: “Umutwe ntugira ‘piece’ ya spare. Iyo umenetse, biba birangiye. Ni yo mpamvu tubasaba kwambara ingofero zujuje ubuziranenge, kuko ni zo zishobora kurinda ubwonko bwanyu mu gihe cy’impanuka. Hari abambara kasike gusa ngo bagire uko basa cyangwa baboneke neza imbere y’abagenzura, nyamara iyo kasike ari mbi, nta cyo imumarira igihe ugeze mu kaga.”

CSP Habintwari yasabye abamotari kutambara kasike zishaje, zifite ibice byacitse cyangwa zitagifite ubukana bwo kurinda umutwe, abibutsa ko bakwiye kwirinda uburangare mu bijyanye n’umutekano.

Ndizeye Emmanuel, umwe mu bamotari bakorera muri Nyagatare, yavuze ko benshi muri bo bari bazi ko kwambara kasike ari igikorwa cyo kwirinda gucibwa amande,

Yagize ati: “Nari nsanzwe nambara kasike ariko sinari nzi neza akamaro kayo ku buryo bwinshi. Ubu nsobanukiwe ko ari yo yonyine yatuma nsigara ndi muzima igihe impanuka yabaye. Niyemeje kujya nambara kasike yizewe kandi ikomeye, nubwo bihenze ariko ni ubuzima bwacu buri mu kaga.”

Niyomukiza Gadi, na we utwara moto muri Nyagatare, yavuze ko nyuma yo kubona uko ingofero zimwe zigaragara imbere y’abagenzuzi, hari ubwo abantu bashukwa bagashaka kugura iziciriritse, ariko ubu yamenye ko ari ukwiyahura.

Ati: “Hari igihe numvaga nambara kasike yo kugira ngo mboneke nk’umunyamwuga. Ariko ubu nsobanukiwe ko ari igikoresho kirengera ubuzima bwanjye. Niyo mpamvu mugiye kubona nsimbuje iya kera yari ishashe, nkajya nambara kasike yemewe n’ubuyobozi.”

Mu butumwa bwatanzwe n’inzego z’umutekano, abamotari basabwe no guha agaciro ubuzima bw’abagenzi batwara, kuko n’abo ubwabo baba bagomba kwambikwa kasike zifite ireme. Banibukijwe ko Polisi izakomeza ibikorwa byo kugenzura umutekano wo mu muhanda nk’ibisanzwe.