Mu rwego rwo gukemura ikibazo cy’ubucucike mu mashuri no guteza imbere ireme ry’uburezi, mu Murenge wa Karangazi hatashywe ku mugaragaro ibyumba bishya by’amashuri ku bufatanye n’Umuryango World Vision Rwanda ku ishuri ribanza rya Nkoma, riherereye mu Kagari ka Nyamirama.

Ibi byumba by’amashuri byubatswe bigizwe n’inyubako zitandukanye zigamije gufasha abana kwiga mu buryo buboneye. Harimo ibyumba 3 by’amashuri bifite intebe z’abanyeshuri, hubatswe kandi ibyumba 2 by’abakobwa, ubwiherero 26, hagurwa imyenda ya siporo n’iy’itorero, inkweto, ibitabo by’imfashanyigisho, ndetse hanatanzwe tablets 3 zagenewe abarimu.

Mu rwego rwo guteza imbere isuku n’isukura, hubatswe ikigega gifite ubushobozi bwa 10m³, hashyirwaho imashini ziyungurura amazi y’abanyeshuri ndetse n’umuyoboro w’amazi.

Ibi bikorwa byose bikaba bigamije gufasha abana kwiga mu buryo bwiza, hubahirizwa ubuzima bwabo n’imibereho myiza. Ibi bikorwa byose byuzuye bitwaye amafaranga y’u Rwanda agera kuri 164,892,054.

Mu izina rya World Vision Rwanda, Bizumuremyi Jean Bosco ushinzwe kurinda abana no guteza imbere uburezi, yashimangiye ko ibikorwa nk’ibi ari igihamya cy’uko umuryango wabo uharanira iterambere rirambye ry’abana n’imiryango yabo.

Yagize ati: “Umwana wese akwiriye kwiga mu buryo buboneye, mu mashuri atarimo ubucucike, n’ibikoresho bimufasha mu masomo. Ni wo murongo dukomeje gushyiramo imbaraga mu bufatanye n’inzego za Leta n’ababyeyi.”

Umuyobozi w’Akarere  wungirije ushinzwe imibereho myiza y’abaturage, Murekatete Juliet, yagize ati: “Ndashimira abafatanyabikorwa bacu ba World Vision Rwanda ku bikorwa by’indashyikirwa bamaze kugeza ku baturage bo mu Karere ka Nyagatare, cyane cyane mu rwego rw’uburezi. Ibi byose byakozwe ari ku nyungu z’abana bacu, kugira ngo bigire mu buryo buboneye kandi butekanye.”

Yakomeje agira ati: “Abanyeshuri ba Nkoma, amahirwe yabegereye kandi ntagomba gupfa ubusa. Mwigane umwete, mukunde amasomo yanyu kugira ngo muzatsinde neza kandi muzabe abantu bazubaka igihugu cyacu.”