Kuri uyu wa 31/10/2019 Hon. Guverineri Mufulukye Fred ari kumwe n'abayobozi b'inzego z'umutekano mu Ntara y'Iburasirazuba ,Umuyobozi w'Akarere,Bwana Mushabe David Claudian n'abayobozi b'inzego z'umutekano zikorera mu karere bari mu nama n'abamotari bakorera muri Nyagatare. Iyi nama igamije gufata ingamba zo kongera umutekano no kurwanya magendu n'ibyaha biyishamikiyeho.

Guverineri yasabye abamotari kuba umusemburo w'iterambere ry'Igihugu bahereye ku mutekano, ashimira abamotari ku kazi keza bakora, abizeza ko ubuyobozi buzakomeza guharanira ko umwuga wo gutwara abantu kuri moto ukomeze utere imbere, abasaba gufatanya no gushyigikira iterambere ry'Igihugu no kurwanya uwo ari we wese wagerageza guhungabanya umutekano n'iterambere ry'Igihugu.

Umuyobozi wa Polisi mu Ntara y'Iburasirazuba, ACP Emmanuel Hatari yasabye abatwara abagenzi kuri moto bo muri Nyagatare gufatanya n'izindi nzego guhashya magendu na bamwe bagitwara moto badafite uruhushya rwo gutwara ibinyabiziga, abatwara batambaye ingofero zabugenewe, abatwara banyoye ibisindisha n'ibindi kuko biteza impanuka nazo zigwamo abantu.

Umuyobozi w'Ingabo mu Ntara y'Iburasirazuba, Gen. Mbaraka Muganga na we yasabye abamotari kugira ibitekerezo byagutse no gushora imari mu mishinga ibateza imbere birinda kwica amategeko no guhungabanya umutekano bagafatanya n'inzego z'umutekano mu kubungabunga umutekano n'iterambere ry'Igihugu.

Guverineri w'Intara yabasabye gukora cyane, bakirinda ibiyobyabwenge kandi bakagira imyitwarire myiza itabahesha isura mbi.

Abamotari kandi bashimiye abayobozi kuri gahunda yo kubegera banizeza abayobozi gukorana mu gucunga umutekano no gushyira mu bikorwa ibyo basabwe.