Abakuru b’imidugudu 108 batoranyijwe bo mu Mirenge yose igize Akarere bitabiriye amahugurwa, hagamijwe kubongerera ubumenyi buzabafasha kuyobora no kuzuza inshingano zabo mu midugudu bayobora.

Aya mahugurwa yateguwe hagamijwe gukemura ibibazo bikunze kugaragara mu miyoborere y’inzego z’ibanze, harimo uburyo bwo gufata ibyemezo bikwiye, gukemura amakimbirane mu midugudu, no guteza imbere ubufatanye hagati y’abaturage n’ubuyobozi.

Banasobanuriwe uko bakwiye gutegura raporo z’imikorere yabo, kuganira n’abaturage ku bibazo bibangamiye iterambere ry’Imidugudu, no guteza imbere ubufatanye n’izindi nzego mu rwego rwo kugera ku miyoborere myiza.

Umunyamabanga Nshingwabikorwa w’Intara y’Uburasirazuba, Dr Jeanne Nyirahabimana yavuga ko aya mahugurwa yatekerejwe nyuma yo kubona ko hari imidugudu y’intangarugero igaragara hirya no hino mu Ntara y’Iburasirazuba, yatanze urugero nk’Umudugudu wa Gakoma mu Murenge wa Karangazi mu Karere ka Nyagatare, Umudugudu wa Nkondo II mu Murenge wa Rwinkwavu muri Kayonza n’Umudugudu wa Nyagasozi mu Murenge wa Sake mu Karere ka Ngoma n’ahandi; bityo hatekerezwa uburyo iyi mikorere myiza yagera n’ahandi.

Yakomeje agaragaza ko aya mahugurwa ari ingenzi mu kongerera ubushobozi abayobozi b’inzego z’ibanze kugira ngo barusheho kunoza imiyoborere.

Yagize ati: “Ubuyobozi bwiza butangirira hasi. Iyo umuyobozi w’Umudugudu afite ubumenyi buhagije ku miyoborere myiza, iterambere rirambye rirashoboka. Tugomba gukomeza kongerera ubushobozi abayobozi bacu kugira ngo bafashe abaturage kugera ku iterambere ryifuzwa.”