Mu rwego rwo gukomeza gufasha abarokotse Jenoside yakorewe Abatutsi mu 1994 kongera kwiyubaka no kubagaragariza ko batari bonyine, Ibitaro bya Gatunda biherereye mu Murenge wa Gatunda  byakoze igikorwa cyo kuremera inka abarokotse Jenoside barimo; Musabyenmariya Assumpta wo mu Murenge wa Katabagemu, Akagari ka Kigarama na Karigirwa Kandida wo mu Murenge wa Mimuri.

Iki gikorwa cyabaye gikurikirana n’icy’uko ibitaro bya Gatunda n’abakozi babyo bibukaga ku nshuro ya 31 Jenoside yakorewe Abatutsi 1994 ku rwibutso rwa Nyagatare.

Musabyemariya na Karigirwa, bombi barokotse Jenoside mu buryo nabo batiyumvishaga, bakaba barasigaye mu buzima bugoye butarimo umutungo cyangwa imbaraga zo kwiyubakira imibereho irambye.

Ubuyobozi n’abaturage bababaye hafi, babubakira inzu zo kubamo. Bahawe inka imwe imwe zizabafasha kubona amata, ifumbire ndetse no gutangira urugendo rwo kwivana mu bukene.

Musabyemariya yagize ati: “Nari narabayeho mu buzima butagira icyizere, ariko inka nashyikirijwe noneho ibaye nk’ihumure rishya. Iyi ni intangiriro y’ubuzima bushya.”

Naho Karigirwa yagize ati: ” Njye byandenze cyane, sinzi n’icyo navuga. Gusa Imana yo mu ijuru usubize aho bakuye. Sinumvaga ko nzongera kubona inka, ariko ubu umwezi wamurikiye iwanjye. Amashimwe yo ni menshi. Abanyarwanda icyizere ni cyose ko ibyabaye bitazongera kubaho ukundi. Nari nibagiwe gushimwa umubyeyi yo kabyara, Perezida wacu dukunda Paul Kagame, intuma y’ Imana mu banyarwanda, Imana yumve imitima yacu ibyo imusabira.”

Umuyobozi w’ibitaro bya Gatunda,  Lt. Col. Dr.Kayitare Emmanuel yavuze ko kwibuka Jenoside yakorewe Abatutsi mu 1994 bidakwiye kuba amagambo gusa, ahubwo bikwiye kugaragarira no mu bikorwa bifasha abayirokotse.

Yagize ati: “Kwibuka ni umwanya wo kongera kwiyibutsa amateka yacu, ariko kandi tugaharanira ko amateka mabi atazongera. Dukwiye no kugirira neza abarokotse Jenoside, kuko baracyafite ibikomere by’umubiri n’iby’umutima.”

Yanavuze ko mu gihe cya Jenoside abari bashinzwe kuvura abarwayi harimo abagize uruhari mu kubura ubuzima bitewe n’imyumvire mibi ya Leta yabibaga urwango mu banyarwanda, kandi bihabanye cyane n’indangagaciro za muganga.

Umuyobozi w’Akarere wungirije ushinzwe imibereho myiza y’abaturage, Murekatete Juliet, yashimye cyane igikorwa cy’ubumuntu cyakozwe n’ibitaro, asaba ko byakomeza kubera abandi urugero.

Yagize ati: “Uyu ni umuco nyarwanda wo kuremera no gufashanya. Abarokotse Jenoside bagomba kumva ko bafite umuryango ubitayeho. Kuba inka ihawe umuntu warokotse Jenoside ni intambwe ikomeye iganisha ku mibereho myiza n’ishema rye.”