Kuri uyu wa 8/3/2020 mu midugudu itandukanye y'Akarere hizihijwe Umunsi Mpuzamahanga w'Umugore. Ku rwego rw'Akarere ibirori byo kwizihiza uyu munsi biri kubera mu mudugudu wa Rurenge,Akagari ka Rurenge ho mu murenge wa Rukomo mu nsanganyamatsiko igira iti: "Umugore ku ruhembe mu iterambere".

Kuri uyu munsi hizihizwaga Umunsi Mpuzamahanga w'Umugore, Tibengana Jacqueline arishimira iterambere akesha kuboha imyenda mu budodo bikaba bitunze umuryango we ndetse akaba amaze kubyigisha abakobwa 60 bari baracikirije amashuri. 

Uzamukunda Dative yashyize hamwe n'umugabo bashakanye batangira bahinga ibigori bakabifatanya no gucuruza inyongeramusaruro.Ubu Dative ari mu batewe inkunga n'Ikigega cya LCF bubaka uruganda rukora ifu y'ibigori rufite agaciro ka FRW 18,000,000 n'inzu y’amafaranga Miliyoni cumi n'enye (14). 

Murekatete Honorette ari kumwe na bagenzi be bagize itsinda abereye umuyobozi ryitwa "Mutima w'Urugo", batangiye barwanya ihohoterwa ryo mu ngo n'ubuharike, none ubu baboha uduseke bikabafasha kwiteza imbere no korozanya amatungo.

Umuyobozi w’Akarere wungirije ushinzwe imibereho myiza yasabye abagore kwitinyuka bakiteza imbere anabibutsa ko iterambere mu muryango ridakwiye kuba intandaro y'amakimbirane no guhohotera abagize umuryango ahubwo rikwiye kubafasha kwesa imihigo y'umuryango no kuzana umudendezo muri uwo muryango.

Uyu munsi abagize amatsinda ya Mutima w'Urugo baremeye abatishoboye babaha amatungo magufi. Mu murenge wa Rukomo wose boroje imiryango 9 ihene zirimo n'eshatu zatanzwe mu kagari ka Rurenge. 

Mme Mukawera Margueritte,Umuhuzabikorwa w'Inama y'Igihugu y'Abagore mu karere yashimye iterambere abagore bamaze kugeraho anabasaba gukomeza gufatanya n'abagabo mu bikorwa biteza imbere umuryango n'Igihugu.

Muri ibi birori byo kwizihiza Umunsi w’Umugore abakinnyi b’Itorero Mashirika Rwanda bahaye abaturage ba Rurenge ubutumwa bujyanye no kurwanya ihohoterwa rikorerwa abana n'iryo mu muryango muri rusange, binyuze mu ikinamico, banasaba ababyeyi n'abana kudahishira ihohotera. 

Kuri uyu munsi kandi hatanzwe ubutumwa bwo kurwanya indwara zandura zirimo na Coronavirusi bakangurirwa kugira isuku no kubahiriza amabwiriza yatanzwe yo kurinda ikwirakwira ry'iyi ndwara.