Kuri uyu wa 8 Nzeli 2018 Umuyobozi wungirije w’Inama Njyanama y’Akarere, Bwana Shema Emmanuel yatangije umwiherero w'iminsi ibiri n'abagize Ihuriro ry’abafatanyabikorwa b'Akarere mu iterambere (JADF:Joint Action Development Forum) hagamijwe guhuza imyumvire ku mihigo y'Akarere, kuyishyira mu bikorwa no kuyikurikirana.

Nyuma yo kugaragarizwa imihigo y'Akarere y'uyu mwaka n'aho igeze ishyirwa mu bikorwa, abitabiriye umwiherero bakoze amatsinda ashingiye ku nkingi za guverinoma (imiyoborere myiza, imibereho myiza n'iterambere ry'ubukungu) hakorwa gahunda ihuriweho n'abafatanyabikorwa yo gushyira mu bikorwa buri muhigo ndetse n'uruhare rwa buri wese mu kwesa imihigo.

Umuyobozi w’Akarere, Bwana Mushabe David Claudian yashimiye abafatanyabikorwa b’Akarere kimwe n’abitabiriye uyu mwiherero, muri rusange kuko bigaragaza ubushake bwa buri wese mu guteza imbere abaturage n’Akarere muri rusange.

Byitezwe ko uyu mwiherero uzasozwa ku munsi w'ejo kuwa 9Nzeli uzafatirwamo ingamba zo gushyira mu bikorwa imihigo ndetse na gahunda ihuriweho n'abafatanyabikorwa batandukanye hagamijwe kwesa imihigo .